اسلام کامسئلہ کفو اور ہندومت کا جنم ورن

اسلام کامسئلہ کفو اورہندومت کاجنم ورن

                                                                                                                                                                                                                          یوٹیوب پر الجزیرہ ٹیلی وژن کی ایک دستاویزی وڈیو دیکھی جس کاعنوان تھا:Dilit Muslims in India  ۔اس میں دکھایا گیا کہ بھارت میں کس طرح دلت طبقے سے امتیازی  اورناروا سلوک ہوتا ہے اوردلت کس طرح اس سے بچنے  کیلئے اسلام اوردوسرے مذاہب  اختیار کرتے ہیں۔ مگر تبدیلئ مذہب کا بھی کچھ فائدہ نہیں ہوتا کیونکہ دوسرے مذاہب کے لوگ بھی انھیں کمتر ہی سمجھتے ہیں۔ ایک دلت عورت بتاتی ہے کہ وہ مسلمان ہوگئی مگر مسلمان ان کے ساتھ بیٹھ کر کھانا نہیں کھاتے اور نہ انھیں  اپنے قبرستان میں مردے  دفنانے دیتے ہیں:

https://www.youtube.com/watch?v=y7xTSy4P9QI&t=70s 

           

                                                                                               بدقسمتی سے اسلام نے مساواتِ آدم کاجواصول دیا تھا ، مسلمان اسے صرف مساجد کے اندر ہی قائم کرسکے، مساجد کے باہر مسلم معاشروں میں ذات پات کا نظام اسی آب وتاب سے چل رہا ہے جیسے ایک روایتی ہندو سماج میں پایا جاتاہے۔درحقیقت یہ شیطانی نظام برصغیر کے لوگوں کے ڈی این اے میں یوں رچا بسا ہے کہ اس بات سے کوئی فرق نہیں پڑتا کہ ان کامذہب کونسا ہے۔

                                                                                                                              اسلام کا”مسئلہ کفو“ بھی برصغیر میں آکر ہندومت کے ”جنم ورن“ کے تصور کاقائم مقام بن گیا ہے۔ یہاں کے لوگ اس سے یہی سمجھے کہ جولاہے کا لڑکا ترکھان کی لڑکی سے شادی نہیں کرسکتا، ترکھان کسی لوہار کی لڑکی کو اپنی بہو نہیں بناسکتا، لوہا ر کسی مغل، اعوان ، ملک یا چودھری گھرانے سے رشتہ جوڑنے کا تصور بھی نہیں کرسکتا اوریہ سارے” امتی“ مل کر بھی سادات سے برابری نہیں کرسکتے ۔ ہمارے گاؤں دیہاتوں میں تو سیّدزادوں کو کوئی آسمانی نسل سمجھا جاتا ہے  اور باقی ذاتوں کے لوگ ان کا یوں احترام کرتے ہیں کہ جیسے یہ پیدائشی طور پر لائقِ پرستش ہیں۔ اسی کو دیکھ کر اقبالؔ نےسادات کے حوالے سے کہا تھا:

مانندِ بُتاں پُجتے ہیں یہ کعبے کے برہمن

                                                                                                                                       اس معاملے میں علماء بھی بے بس دکھائی دیتے ہیں۔ وہ اصولی طور پر تو بتادیتے ہیں کہ اسلام میں فضیلت و برتری کی بنیاد صرف تقویٰ ہے ، لیکن عملاً لوگوں کے دلوں سے ذات پات کے بتوں کو نکالنے کی کوئی  تدبیر ان کے پاس نہیں۔تلخ حقیقت یہ ہے کہ ایک عام مسلمان جب تک روایتی طورپر مسلمان ہی رہتاہے ، وہ ذات پات کی تفریق کو ایک ناگزیر برائی سمجھ کر اس کے ساتھ سمجھوتہ کیے رکھتاہے تاوقتیکہ وہ مذہب سے برگشتہ ہوکر لبرل یا ملحد نہ ہوجائے ۔ اس کے بعد ہی وہ مساواتِ انسانی کی مغربی تعلیم کو اپنا کر اس امتیاز کے خلاف آواز اٹھانے لگتاہے۔روایتی مسلم ذہن کے حوالے سے یہ ساری صورتحال بہت ہی مایوس کن ہے!

*******************************