جاوید احمد غامدی صاحب سے ایک سوال وجواب

جاوید احمد غامدی صاحب سے ایک سوال وجواب

محترم جاوید احمدغامدی صاحب!

اسلام وعلیکم!

امید ہے آپ  بخیریت ہوں گے!

                                                                                                                               آپ سے حضورؑ کے غارِ حرا میں قیام کے حوالے سے اپنی ایک الجھن کے بارے میں پوچھنا چاہتاہوں کہ نبوت ملنے سے قبل آپ کے قیامِ حرا کی نوعیت کیا تھی؟ عام طورپر اس کاجواب یہ دیا جاتاہے کہ آپ وہاں غوروفکرکیا کرتے تھے، لیکن یہ بات غیر فطری سی لگتی ہے۔ غوروفکر اورکسی مسئلے کوسلجھانے کیلئے انسان کچھ وقت کیلئے تنہائی اختیار کرسکتاہے، لیکن ایک سنسان جگہ  پر شب وروز کاقیام اس مقصد سے مناسبت نہیں رکھتا۔

                                                                                                                                                    میرے خیال سے تو آپؑ کاقیا مِ حرا نبوت سے پہلے کانہیں، بلکہ بعد کاواقعہ ہے جیسا کہ حضرت عائشہ کی روایت سے ظاہر ہوتاہے کہ حراجانے سے قبل ہی روئے صادقہ کی صورت میں نبوت کی شروعات ہوچکی تھیں اورغارِ حرا کی خلوت وریاضت آپؑ نے حکمِ خداوندی سے ہی اختیار کی تھی جس کا کہ ہوسکتاہے خوابوں کے ذریعے آپؑ کو اشارہ ملا ہو۔ اس طرح آپؑ کاقیامِ حرا بالکل ویسی ہی چیز ہے جس طرح حضرت موسیٰؑ نے کوہِ طورپر چالیس روز ریاضت کی تھی۔ تاہم چونکہ یہ میرا ذاتی خیا ل ہے ، اس لیے اس پر مجھے شرح صدر نہیں ہے۔

                                                                                                               اس حوالے سے آپ سے رہنمائی کی درخواست ہے۔

                                                                                

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                    عرفان محمود

                                                                                          11اکتوبر 1999ء

ــــــــــــــــــــــــــــــــــــــــــــــــــــــ

محترمی ومکرمی عرفان محمود صاحب

                                                                                  

                                                                                                                       اسلام وعلیکم ورحمتہ اللہ۔ بیمار رہا، اس لیے جواب میں تاخیر ہوئی۔ مجھے آپ سے اتفاق ہے۔ سیدہ عائشہ کی روایت سے یہ بات معلوم ہوتی ہے کہ حرا میں آپ سچے خوابوں کی صورت میں نبوت کی شروعات کے بعد ہی گئے۔ خواب میں آپ کو اس اشارہ ملا، یہ بات بھی قرینِ قیاس ہے  اورسیدناموسیٰ کی ریاضت  سے اس کی مشابہت بھی سمجھ میں آتی ہے۔

                                                                                                                             شرح صدر کیلئے اللہ تعالیٰ سے دعا کرتے رہیے۔

                                                                                                

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                        جاوید

                                                                             8دسمبر 1999ء

***************************

سنت کاوسیع تصور

سنت کاوسیع تصور

                                                                                                                               مسلم تمدن میں ”سنتِ نبویؑ“ کے تصور کوبہت عملی اہمیت حاصل ہے۔ سنت کے عنوان سے مسلمانوں میں کوئی بھی بات باآسانی رواج پاجاتی ہے۔آج کے جدید دورمیں اسلام کوایک زندہ تہذیب کے طورپر قائم رکھنے کیلئے ضروری ہے کہ سنت کے روایتی تصور میں وسعت لائی جائے۔بدقسمتی سے بہت سی سنتوں کے حوالے سے مسلمانوں میں بہت وقتی ،مقامی اورمحدود تصورات راسخ ہیں۔

                                                                                                                        مثال کے طورپر عام تصور کےمطابق کھجور سے روزہ افطار کرنا سنت ہے۔ یہ ایک محدود جغرافیائی تصور ہے۔ وسیع نظری کے تحت اصل سنت یہ قرار پانی چاہیئے تھی کہ ”کسی ایسے علاقائی میوے سے روزہ افطار کرنا مستحب ہے جو عام وخاص کو ارزانی وفراوانی کے ساتھ دستیاب ہو۔“ اس سنت کے تحت پھر جس طرح عربوں کیلئے کھجور سے روزہ افطار کرنا باعثِ ثواب ہے ، اسی طرح پنجابیوں کیلئے بیروں، بلوچیوں کیلئے خوبانی، جاپانیوں کیلئے املوک(جاپانی پھل) ، آسٹریلویوں کیلئے اسٹرابیری ، وغیرہ سے روزہ افطار کرنا مسنون ہوتا۔سنت کے اس محدود تصور سے یہ ہوتاہے کہ جہاں کھجور دستیاب نہیں ہوتی ، وہاں کثیر زرِ مبادلہ خرچ کرکے کھجور درآمد کی جاتی ہے اوررمضان میں غریبوں پر کافی مالی بوجھ پڑجاتاہے۔

                                                                                                                                              اسی طرح ایک اورروایتی سنت مسواک ہے جس کے مطابق دانتوں کی صفائی کیلئے لازمی طورپر لکڑی کی ڈنڈی ہی ہونی چاہیئے، حالانکہ اصل سنت یوں سمجھی جانی چاہیئے تھی کہ ”منہ اوردانتوں کی باقاعدہ صفائی مسنون ہے۔“ پھر اس سنت کے تحت کوئی بھی ذریعہ مثلاً مسواک، ٹوتھ برش، ماؤتھ واش،وغیرہ اختیار کیا جاسکتاتھا اورمسلم ذہن ان جدید طریقوں کے حوالے سے متذبذب نہ ہوتا کیونکہ اصل سنت مسواک نہیں بلکہ دانتوں کی صفائی ہوتی ۔

                                                                                                                   اسی طرح سرمہ لگانانہیں ، بلکہ آنکھوں کی صفائی کوسنت بتایا جانا چاہیئے تھا، اس کے بعد آئی ڈراپس کا استعمال بھی اسی طرح باعثِ ثواب خیال کیا جاتا جس طرح کہ سرمہ کالگانا کیا جاتاہے۔ اب وقت کے ساتھ مسلم سماج میں سرمہ متروک ہوجانے سے آنکھوں کی صفائی بھی رہ گئی ہے۔

                                                                                                 اسی طرح پگڑی یا عمامہ باندھنا نہیں بلکہ سر کوگردوغبار سے بچانا سنت ہونا چاہیئے تھا، پھر اس سنت کانتیجہ یہ ہوتاکہ مسلمانوں میں ماحول کو صاف ستھرابنانے کارجحان پیداہوتا اوروہ اپنے شہروں میں پختہ سڑکوں اورسرسبز میدانوں کااہتمام کرتے۔

**************************

ہم سب ملحد ہیں؟

ہم سب ملحد ہیں؟

                                                                                                                                                                               ملحدین  جب ہلکے پھلکے موڈ میں ہوتے ہیں تو عام طورپر خداکے ماننے والوں سے یوں کہا کرتے ہیں کہ دراصل خدا کاانکار کرنے میں ہم کوئی تنہا نہیں ، بلکہ آپ بھی  اپنے خدا کے علاوہ دوسرے مذاہب کے خداؤں  کا انکار ہی کیے ہوتے ہیں۔ یعنی ہم اگر 1000 خداؤں کاانکار کرتے ہیں تو 999 خداؤں کے حوالے سے آپ بھی ملحد ہی ہیں! یہ استدلال مکالمے کی شکل میں کچھ یوں ہوتاہے:

مومن: ”ملحد صاحب! بھلا یہ ملحد ہونا کیسا  ہوتاہے؟“

ملحد(مسکراتے ہوئے): ”میرے خیال میں تو دوسرے خداؤں کے حوالے سے  ہم دونوں ہی ملحد ہیں۔“

مومن: ”اوہ! ۔۔۔وہ کیسے؟“

ملحد: ” بھئی، تم اپنے خداکے علاوہ باقی سب خداؤں کاانکار کرتے ہو اور  میں تمھارے خداکوبھی نہ مان کرصرف ایک مزیدخداکاانکار کردیتاہوں۔۔۔“

                                                                                                                                                            ملحدین کایہ استدلال کچھ ایساہی ہوتاہے کہ جیسے ایک شادی شدہ کسی کنوارے سے سوال کرے کہ:

شادی شدہ:  ”میاں، یہ  کنوارہ ہونا کیسا لگتاہے؟“

کنوارہ:  ”میرے حساب سے تو دوسری عورتوں کے حوالے سے ہم دونوں ہی کنوارے ہیں۔“

شادی شدہ: ”اچھا، وہ کیسے؟“

کنوارہ: ”دیکھو، تم اپنی بیوی کے علاوہ باقی سب عورتوں کے لیے کنوارے ہو اورمیں باقی عورتوں کے علاوہ ایک مزید عورت یعنی تمھاری بیوی کے لیے بھی کنوارہ ہوں ۔۔!!!!!!!!“

                                                                                                                                     اس مثال سے ملحدین کے استدلال کی لغویت واضح ہوجاتی ہے۔حقیقت یہ ہےکہ معتقدین دوسرے مذاہب کے خداؤں کو خالقِ کائنات کی حثیت سے مسترد نہیں کرتے بلکہ ان  کے نہ ماننے کی وجہ وہ غلط صفات ہوتی ہیں جوان سے منسوب کی جاتی ہیں۔ یہ سوچنا کہ ایک مسلمان کسی عیسائی دیکھ کریوں کہتاہوگاکہ : ”وہ رہا ایک ملحد!“۔۔۔۔ نہایت احمقانہ بات ہے۔اس لیے کہ اسے عیسائیت سے کئی اختلافات ہوسکتے ہیں لیکن عیسائیوں کاملحد نہ ہونا اس کیلئے بالکل تسلیم شدہ  امرہے۔ اسی لیے ایک رواداری کے ماحول میں جب مختلف مذاہب کے پیروکار ملتے ہیں تو اکثر یہ جملہ سننے میں آ تا ہے کہ ” اگرچہ ہمارے مذاہب جدا ہیں مگرہم سب عبادت توایک ہی خداکی کرتے ہیں!“

***************************

پیدائش سے پہلے اورموت کے بعد

پیدائش سے پہلے اورموت کے بعد

معروف امریکی ادیب اورمزاح نگار مارک ٹوائن کاموت کے حوالے سےایک قول ہے:

“I don’t fear death, in view of the fact that I had been dead for billion and billion of years before I was born, and had not suffered the slightest inconvenience from it.”

”میں موت  سے اس لیےخوفزدہ نہیں ہوتا کیونکہ پیدائش سے پہلے  بھی میں کھربوں سال  کیلئے مردہ ہی  تھا، اور مجھے اس سےذرا بھی تکلیف نہیں ہوئی تھی( لہٰذا اب دوبارہ مرنے سے بھی مجھے کوئی فرق نہیں پڑے گا)۔"

         

                                                                                                                                    یہ کہنا ایساہی ہے جیسے ایک  نوجوان کسی عورت کے عشق میں مبتلا ہوجائے اور دل کی گہرائیوں سےاسے چاہنے کےبعد جب جدائی کامرحلہ آئے تووہ اپنی محبوبہ سے کہے:”مجھے تمھاری جدائی سے کوئی تکلیف نہیں ہوگی کیونکہ تم سے ملنے سے پہلے بھی میں نے بیس پچیس برس زندگی تمھارے بغیر گزاری تھی اورمجھے ذرابھی دکھ محسوس نہیں ہواتھا!!“

                                                                                                                                        بھلا زندگی جیسے شعوری اورجذباتی تجربے کےبعد انسان اس سے پہلے جیسی کیفیت میں واپس کیسے جاسکتاہے؟ حتی ٰ کہ اگرموت کے بعد عدم بھی ہے  تو یہ عدم زندگی سے پہلے کے عدم سے کچھ مختلف ہی ہوگا۔

٭٭٭٭٭٭٭٭٭٭٭٭٭٭٭٭