زندگی بعدزچگی!
ایک ماں کے رحم میں دو بچے موجود تھے۔
ایک نے دوسرے سے
پوچھا:”کیا تمھارے خیال میں زچگی کے بعد بھی کوئی زندگی ہے؟“
دوسرے نے جواب دیا : ”ہاں کیوں نہیں، زچگی کے بعد ایک زندگی
ضرور موجود ہے۔ شاید ہم یہاں اسی اگلی زندگی کی تیاری کیلئے موجود ہیں۔“
”کیا فضول بات ہے۔ “ پہلے بچے نے ناک چڑھاتے کہا: ”زچگی کے بعد
کوئی زندگی نہیں۔ بھلاایسی زندگی کس طرح کی ہوگی؟“
”معلوم نہیں، لیکن وہاں پر یہاں سے زیادہ بڑی جگہ ہوگی۔شاید
ہم وہاں اپنے پیروں پر چلیں گے اورمنہ سے کھائیں پیئں گے۔“
”یہ کتنا اوٹ پٹانگ خیال ہے۔ پیروں پر چلنا محض ایک تخیلاتی
خواہش ہے جس کا پوراہونا ممکن ہی نہیں۔ اورمنہ سے کھانا ! ۔۔کتنا مضحکہ خیز ہے۔ خوراک صرف ناڑ کے ذریعے
ہی ہمارے جسموں میں پہنچتی ہے۔زچگی کے بعد ناڑ کٹ جاتاہے ، اس لیے اس کے بعد کسی
زندگی کاامکان نہیں۔“
”میرے خیال میں زچگی کے بعد کسی طرح کی زندگی ضرور ہوتی ہے۔
شاید وہ اس زندگی سے مختلف ہوتی ہے۔“
”مگر آج تک کسی نے رحم میں واپس آکر نہیں بتایا کہ باہر بھی
کوئی دنیا ہے۔زچگی پر یقیناً زندگی کاخاتمہ ہوجاتاہے۔ اس کے بعد تاریکی کی گہری چادر
تن جاتی ہے اورکوئی احساس باقی نہیں رہتا۔“
”مگر میرا دل کہتاہےکہ ہم یقیناًماں کودیکھیں گے اوروہ ہمیں
پالے گی ، پیارکرے گی اورلوریاں سنائے گی۔۔۔“
”ماں؟؟؟۔۔۔ کیاتم بھی ان پریوں کی کہانیوں پر یقین رکھتے ہو؟ اگر ماں کاکوئی
وجود ہے تو پھر وہ اب کہاں ہے؟“
”وہ ہمارے آس پاس ہی موجود ہے۔ہم اسی کے وجود میں تو زندہ
ہیں۔ اس کے بغیر تو ہماری یہ زندگی ممکن ہی نہیں۔“
”پھر وہ ہمیں دکھائی کیوں نہیں دیتی؟ میں سمجھتاہوں جو چیز
نظر نہ آئے ، اس کے وجود کایقین رکھنا ایک فریب خیالی ہے۔ ایسی کسی ماں کا کوئی
وجود نہیں ہے ۔“
اس پر دوسرے بچے نے جواب دیا: ”لیکن بعض اوقات جب ہم بالکل خاموش
ہوتے ہیں، تو ماں کااحساس ہوتاہے۔اس کی مدھم مدھم سی سرگوشیاں بھی سنائی دیتی ہیں
جیسے وہ ہمیں پکاررہی ہو۔اس کے وجود کی حرارت بھی محسوس ہوتی ہے۔۔۔۔“
”ہاہا۔۔۔ یہ سارے تمھارے ذہن کی پیداوار ہے۔ تم نے خود کو
موت کے خوف سے بچانے کیلئے ایک خیالی ماں کاتصور تراش رکھاہے۔تمھیں حقیقت پسند
بن کر یہ مان لینا چاہیئے کہ ناڑ منقطع
ہوجانے کے بعد ہم بالکل فنا ہوجاتے ہیں، بالکل ایسے ہی جیسے اس رحم میں آنے سے
پہلے ہم بالکل عدم تھے۔“
”لیکن اگرزندگی
صرف یہی ہے تو پھریہ جو ہماری آنکھیں ہیں ، منہ ہیں، ہاتھ پاؤں ہیں۔۔۔ان اعضاء
کاکیامقصد ہے؟“
”ضروری نہیں کہ ہر چیز کاکوئی مقصد ہو۔ یہ اعضا توشاید رحم کی دیواروں کے ساتھ سہارا لینے کیلئے ہیں
اوربس۔۔۔“
”تم کچھ بھی کہو ، میرا احساس ہے کہ زچگی کے بعد بھی ایک
زندگی ہے ، ایک دنیا ہے۔۔۔۔۔۔“
”اچھا بھئی ۔۔۔جب زچگی کامرحلہ آئے گا تودیکھاجائے گا۔۔۔فی
الحال تو ہمیں اس زندگی کا بھر پور طریقے سے تجربہ کرنا چاہیئے۔اس کو کوئی معانی
دینے چاہیئں ،اس کاکوئی مقصد تلاش کرنا چاہیئے۔۔۔۔“
”اس زندگی کامقصد اگلی زندگی کاتیاری ہے۔اچھا، اگر زچگی کے
بعد واقعی کوئی زندگی ہوئی تو تم وہاں کیا کروگے؟“
”میں؟۔۔۔پتانہیں۔۔۔میں نے کبھی سوچا نہیں اس بارے میں ۔۔۔۔“
”میں نے بہت کچھ سوچا ہے ۔۔۔میں نے ماں سے بہت سی باتیں کرنی
ہیں ۔۔بہت کچھ پوچھنا ہے۔۔۔میں نے اس کی ایک تصوراتی تصویر بنا رکھی ہے۔ یقیناً
ماں بہت خوبصورت اورپیارکرنے والی ہوگی ۔“
”دل کی تسلی کو یہ خیا ل اچھا ہے۔۔۔“ پہلابچہ طنزاً ہنستے
ہوئے بولا
”یہ دل کی تسلی نہیں، روح کایقین ہے۔۔۔“
”اچھا بھئی۔۔۔اب اس
موضوع پر کل گفتگو کریں ۔ ابھی تومجھے نیند آرہی ہے۔“
پھر وہ دونوں سوگئے۔
٭٭٭٭٭٭٭٭٭٭٭٭
No comments:
Post a Comment