روح اورزندگی بعد موت

 روح اورزندگی بعدموت

                                                                                                                سیم ہیرس (Sam Harris) اوردوسرےمنکرینِ آخرت استدلال  کرتے ہیں کہ انسان کاشعور تمام تر دماغ کی پیداوار اورفعل(فنکشن ) ہوتاہےاورنیوروسائنس کے تجربات ثابت کرچکے ہیں کہ دماغی ٹشوز کو کسی قسم کانقصان پہنچنے سے انسان  کا حافظہ اورفہم متاثر ہوتے ہیں۔مثال کے طورپر ہم دیکھتے ہیں کہ اگرکسی شخص کے سرپر چوٹ لگے تو وہ اپنے قریبی عزیزوں کو بھی پہچاننے سے قاصر ہوجاتاہے۔اس لیے سائنسی  مؤقف یہی ہے کہ دماغی موت پر انسان کی شعوری شخصیت یوں بکھر جاتی ہے کہ پھول سے خارج ہونے کے بعد خوشبو۔۔۔اوراس بات کاکوئی امکان نہیں رہتا کہ انسان موت کے بعد اپنی موجودہ شخصیت کے ساتھ اسی طرح زندہ رہ سکتاہو۔

https://www.youtube.com/watch?v=-VXiF1MRvIE 

زندگی بعد موت کوثابت کرنے کے دواستدلال ہیں:

1) یہ کہ انسان کے اندر کسی غیر متبدل اورغیرفانی مادہ(روح) کاوجود ثابت کیا جائے جس کے اندرتمام انسانی شعورمحفوظ ہوتاہے اورجو مرنے کے بعد بھی اپنے افعال  جاری  رکھتاہے۔یہ ہندی الاصل مذاہب(ہندومت، بدھ مت اورجین مت)  اوراہلِ روحانیت کا  طریقۂ استدلال ہے۔

2) یہ کہ اسے محض خداکا ارادہ اورقدرت تسلیم کیا جائے کہ وہ انسانی جسم وذہن کو فنا ہونے کے بعد از سرِ نو دوبارہ پیداکرے گا۔یہ اسلام اوردوسرے ابراہیمی ادیان کاطرزِ استدلال ہے۔

                                                    پہلی صورت میں یہ انسان کی ایک داخلی استعداد ہے جو بقا بعدموت کولازم کرتی ہے اوردوسری صورت میں یہ ایک خارجی قوت  کافعل ہے کہ وہ ایک معدوم ہستی کو پھر سے اسی طرح پیداکردے گا جس طرح پہلی بارپیداکیاتھا۔

                                            دوسرے طریقۂ استدلال میں یہ ثابت کرنے کی ضرورت   نہیں رہتی کہ انسان کے ذہنی اورشعوری اعمال کاانحصار دماغی خلیوں(نیورانز) اورنظامِ عصبی پر نہیں ہے۔اگریہ ثابت بھی ہوجائے کہ انسان اپنے اندر روح جیسی کوئی غیرفانی ہستی نہیں رکھتا اورموت پر انسانی شعور بالکل فنا ہوجاتاہے ۔۔۔۔تو پھربھی زندگی بعد موت کاعقیدہ متاثر نہیں ہوتا۔

                                                                                                                یہ بھی قابل ذکر ہے کہ جب مشرکینِ مکہ نے زندگی بعد موت پر یوں حیرت آمیز اعتراض کیاکہ جب ہم انسان موت کوبعد گل سڑ چکے ہوں گے پھر کسی زندگی کاکیا امکان ہوگا؟ تو اس کے جواب میں قرآن نے یہ ثابت کرنے کی کوشش نہیں کی کہ انسان کے اندرایک"روح" موجودہوتی  ہے جو جسم کے گل سڑ جانے کے باوجود باقی رہتی ہے بلکہ اس نے اس اعتراض کایہی جواب دیا کہ جس خدانے پہلی مرتبہ انسان کو پیداکیا تھا،وہی خدا اپنی قدرتِ کاملہ سے مرنےکے بعد انسان کو پھر سے وہی جسم اورزندگی عطا کرے گا۔

                                                                                                                     اسی مفہوم میں قرآن میں روح کو 'خداکاامر' یعنی خداکاارادہ اورحکم کہا گیا ہے۔یعنی خداکے حکم سے ہی انسان پہلی مرتبہ زندگی پاتاہے، خداکے حکم سے اس کے اندر سے موت کے وقت یہ زندگی کی صلاحیت سلب کرلی جاتی ہے اورپھر خداہی کے حکم سے مرنے کے بعد اس انسان کو جزاوسزا کیلئے دوبارہ زندہ کیا جاتاہے۔ 

                                                                                                         قرآن میں 'روح' کالفظ کسی باشعور اورصاحبِ احساس ہستی کے طورپر نہیں آیا جو زندگی کی صورت میں گوشت پوشت کے انسانی جسم کے اندر قید ہوجاتی ہے اورموت کے بعد خوشی خوشی عالمِ ارواح کی طرف پرواز کرجاتی ہے۔بلکہ قرآن میں یہ لفظ 'نفس' اور'جان' کے معنوں میں آیا ہے۔ 

                                                                                                                                گویا دوسرے لفظوں میں قرآن نے اس امر کی تردید نہیں کی کہ انسان مرنے کے بعد اپنے ذہن وشعور اورجسم سمیت فنا ہوجاتاہے اوراس کے اندر زندگی والا کوئی مادہ باقی نہیں رہتاتاوقتیکہ خدااپنے علم اور ارادے کے ذریعے اس کی دنیا وی شخصیت کوذہن وجسم سمیت دوبارہ زندہ کرے ۔

***************************