ملحدین اور خدا کاثبوت

ملحدین اور خدا کاثبوت

                                                                                                                                                            مذہبی لوگوں کی طرف سے عام طورپر ملحدین پر یہ اعتراض کیا جاتاہےکہ وہ دراصل خدا کاانکار اس لیے کرتےہیں کہ وہ گناہوں سے رکنا نہیں چاہتے اور یہ بھی نہیں چاہتے کہ موت کے بعد ان کا اخلاقی احتساب ہو، اس لیے یہ گناہ کرنے کی بلاروک ٹوک آزادی کی خواہش ہے جو انکارِ خدا کا حقیقی سبب ہوتی ہے۔

                                                                                                                  اس پر ایک ملحد نے اپنے یوٹیب چینل کی وڈیو میں اس کا یوں جواب دیا کہ بھلا ملحدین۔۔۔ جو کہ اتنے پڑھے لکھے اورذہین لوگ ہوتے ہیں۔۔۔ ایسی حماقت میں مبتلاہوں گے  کہ محض گناہ کرنےکیلئے وہ خداکا انکار کردیں گے جبکہ  وہ جانتے ہیں کہ صرف ان کے نہ ماننے سے خداکاوجود باطل نہیں ہوجائے گا۔۔۔ یعنی ملحدین اس کبوتر کی طرح بے وقوف تو نہیں ہیں جو آنکھیں بند کرلینے سے سمجھ لیتا ہے کہ  بلی کا وجود نہیں رہا!

https://www.youtube.com/watch?v=S75PQSWQUEY 

                                                                                             یہ بیان اس اعتراض کی درست نوعیت کو نہ سمجھنے کی مثال ہے۔ اعتراض یہ نہیں ہے کہ ملحدین جانتے بوجھتے انکارِ خدا کو ایک حکمتِ عملی کے طورپر اختیار کرتے ہیں۔ اعتراض یہ ہے کہ ملحدین لاشعوری طورپر اخلاقی پابندیوں کو پسند نہیں کرتے، وہ ایک ایسی آزاد زندگی گزارنا چاہتے ہیں جس میں وہ کسی خدا کے آگے جوابدہ نہ ہوں۔۔۔ا س لاشعوری محرک کے زیرِ اثر وہ کرتے یہ ہیں کہ خدا کے اثبات کیلئے درکار شواہد کامعیار بہت بلند کردیتے ہیں ۔عملی زندگی کے کاروباری مفادات میں تو”قیاس“ کوبھی اہمیت دے دیتے ہیں، لیکن خداکے معاملے میں وہ تجرباتی ثبوت (Empirical Evidence) مانگتے ہیں۔۔۔زندگی کو خطرہ ہو تو عمارت میں آگ لگ جانے کی محض ”افواہ“ سن کربھی کھڑکیوں سے باہر چھلانگیں لگادیتے ہیں، لیکن زندگی بعدموت کیلئے ان کاتقاضا ہوتاہےکہ انھیں عذابِ قبر کی وڈیو فوٹیج دکھائی جائے!

                                                                                                                          خدا کے اثبات کیلئے ان معیار اتنا کڑا ہوتاہے کہ سائنسی دریافتوں میں موجود لطیف اشارات پر کوئی توجہ نہیں دیتے اورکہتے ہیں کہ خدا کواس وقت تک نہیں مانیں گے جب تک اس کاوجود فزکس اورکیمسٹری کی لیبارٹریوں میں ثابت نہ ہوجاتا یا جب تک سائنسدان خدا کو ایک ریاضیاتی مساوات کی صورت میں ظاہر نہیں کردیتے!

                                                                                          یہ ایک نفسیاتی مسئلہ ہےکہ جب آپ کسی چیز ماننا نہیں چاہتے تو پھر ایسے شواہد کاتقاضا کرتے ہیں جن کاملنا اس طبعی دنیا میں ممکن ہی نہ ہو۔یہاں ایک لطیفہ ملحدین کی پوزیشن کو خوب واضح کرتاہے:

                                                                                           دوبچوں کو سکول کے امتحان کابھی سامنا تھا اورساتھ ہی کھیل کود اوردوسرے مشاغل کو بھی جی چاہ رہا تھا۔ اس پر ایک بچے نے جیب سے سکہ نکالا اور بولا:”میں سکہ اچھالتاہوں۔ ۔۔اگر ہیڈ آیا تو کرکٹ کھیلیں گے۔ ۔۔ٹیل آئی تو فلم دیکھیں گے ۔۔۔اور اگر سکہ  زمین پربالکل سیدھا کھڑاہوگیا تو خوب پڑھائی کریں گے!“

                                                                                            یوں ملحدین بھی گویا یہی کہتے ہیں کہ اگر ہیڈ آیا تو کوئی خدا نہیں اور اگر ٹیل آئی توموت کے بعد کوئی زندگی نہیں ۔۔۔ہاں البتہ سکہ زمین پر سیدھا کھڑا ہوگیا تو ایمان لے آئیں گے!                
                                                                                                                     

*********************************

ملحدین اور حیوانات ،ایک پیج پر

ملحدین اور حیوانات ،ایک پیج پر

                                                                                     کیا انسانی زندگی کےکوئی معانی ہیں؟ کیا کائنا ت کے پیچھےکوئی مقصدہے؟ کیا زندگی بس یہی ہے، اور اس کے بعد ہم خاک کا حصہ بن جاتے ہیں ؟ یہ وہ سوالات ہیں جو ملحدین کی جبینوں پر شکنین ڈالنے کیلئے کافی ہوتے ہیں۔ اس کے جواب میں وہ ایک بیانیہ دوہراتے ہیں جواب ایک اعتبار سے الحاد کا ’کلمۂ شہادت ‘ بن چکاہے کہ :

“The Universe just is what it is…There is no purpose in life unless you make one for yourself…”

                                                                                                               یعنی  کائنات نہ تو کوئی حادثہ ہے اورنہ کسی خالق کی تخلیق، یہ تو بس ایسی ہی ہے جیسی کہ یہ ہے۔۔۔انسانی زندگی کا کوئی معروضی مقصدنہیں، ہاں البتہ ہر فرد اپنے طور پر اپنی  زندگی کو کوئی معانی پہنا سکتاہے اور اپنے لیے کوئی ذاتی مقصد بناسکتاہے۔۔۔

                                                                                              اگر ہم کائنات کو انسانوں کے بغیر تصور کریں تو واقعی باقی کائنات ایک ملحدکائنات (Atheist Universe) ہی ہے۔پتھر، درخت اور جانور اگر اپنی رائے ظاہر کرسکیں تو وہ ملحدین سے بالکل اتفاق کریں گے۔ اگر جانوروں کو گویائی مل جائے تو کائنات اور زندگی کے حوالے سے ان کاکہنا بھی یہ ہوگا کہ :

                                                    ”زندگی توصرف بقاء وتولیدکامعاملہ ہے، نہ جانے انسانوں نے یہ تخلیق اورمقصدیت جیسے مسائل کہاں سے بنالیے ہیں! اسی لیے انھوں نے فلسفہ ،مذہب، تصوف اورنہ جانے کیا کیا علوم تراش کررکھے ہیں اور خوامخواہ مقصدیت  کے سوال پر دماغ سوزی کرتےرہتے ہیں۔اگر انسان زندگی کا ہمارے والا ماڈل اختیار کرلیں تو انھیں ان بیکار کی الجھنوں سے نجات مل جائے!!۔۔۔“

                                                                                                                           مثال کے طور پر اگر کسی کتے سے دریافت کیا جائے کہ ” کیوں، میاں ڈبّو! تمھارے خیال میں زندگی کا کیا مقصد ہوسکتاہے؟“ تو اس کے جواب میں وہ یہی کہے گاکہ: ”زندگی کامقصد؟ ۔۔ مقصد تو کوئی نہیں ۔۔ہاں البتہ میں نےاپنے طورپر اپنی زندگی کامقصد مالک کے گھر کی رکھوالی بنا رکھا ہے!“

                                                                                     اسی طرح ملحدین بھی یہی کہتے ہیں کہ  نہ تو کسی ان دیکھی خدا کوماننے کی ضرورت ہے اور نہ دل کی تسلی کیلئے موت کے بعد کسی زندگی کے خواب  دیکھنے کی ۔۔۔بس اپنی زندگی کاکوئی ذاتی مقصد جیسے آرٹ کافروغ ، عالمی امن کیلئے جدوجہد، ماحول کی حفاظت، سائنسی تحقیق وغیرہ ،بناؤ۔۔کھاؤ پیئو۔۔۔دوست بناؤ ۔۔۔ خوش رہو ۔۔۔ زندگی کے پھل سے آخری قطرے تک رس نچوڑو۔۔۔ اور پھراطمینان سے مرکر دوبارہ ستاروں کی دھول بن جاؤ۔۔

واقعی کائنات اور زندگی کے حوالے سے ملحدین اور جانورایک ہی صفحے پرہیں!!!!

*************************

کیا انسان اور بندر کزن ہیں؟

کیا انسان اور بندر کزن ہیں؟

                                                                                                                                                             انسانوں اور جانوروں کے درمیان جسمانی مشابہتوں سے ان کے مشترکہ جدِامجد  پر استدلال ڈاروینی نظریۂ ارتقا کاایک بنیادی ستون ہے۔ چارلس ڈارون نے اپنے مشاہدات کے حوالے سے لکھا تھا:

    “Seeing a dog, horse and man yawn, makes one feel how all animals are built on one structure.”                                                     (1837/Encyclopedia Britannica, Vol.5)                                                     

”کتے، گھوڑے اور انسان کوجمائی لیتے ہوئےدیکھا جائے تو محسوس ہوتاہے کہ کس طرح یہ جانور ایک ہی ساخت پر بنے ہوئے ہیں۔“

                                                                                               بائیولوجی کی وہ شاخ جو جانداروں کی مختلف انواع میں ساختی ، عضویاتی اورجینیاتی یکسانیت کامطالعہ کرتی ہے ، ہومولوجی (Homology) کہلاتی ہے۔ مشابہت سے مشترکہ وراثت  پر استدلال کرنا ایسے ہی ہے جیسے آپ اگر ملتی جلتی شکلوں کے دوافراد دیکھیں تو قیاس کریں کہ یہ ایک ہی والدین کی اولاد ہوں گے۔

                                                                                                            تاہم یہ دراصل چیزوں کو دیکھنے  کی رسائی (اپروچ) کافرق ہے۔ انسانوں اور چمپینزیوں کے  ڈی این اے میں 99% مشابہت پائی جاتی ہے۔اب جس طرح اس سے آپ یہ قیاس کرسکتے ہیں کہ ان دونوں کاایک ہی جدِ امجد(Common Ancestor )ہے ، اسی طرح آپ یوں بھی سوچ سکتے ہیں کہ ان کایک مشترکہ خالق (Common Creator) ہے۔

                                                                                           اگر آپ کو اردو  زبان کے پانچ ناول پڑھنے کیلئے دیے جائیں اوران کے مطالعے سے آپ  نوٹ کریں کہ ان کا  طرزِ تحریر، جملوں کی بناوٹ، مکالموں کا انداز، مرکزی کرداروں کے سماجی پس منظراورکہانیوں کے پلاٹ  ایک جیسے ہیں۔۔۔تو اگر آپ بدگمانی سے سوچیں گے تو کہیں گے کہ یہ پانچوں ناول ایک دوسرے سے نقل کیے گئے ہیں ، لیکن اگر بے تعصب ہوکر سوچیں گے تو یہ بھی کہہ سکتے ہیں کہ یہ پانچوں ناول ایک ہی مصنف کے ذہن اورقلم سے نکلے ہیں!

                                                                                              اسی طرح اگر آپ کو موسیقی کی مختلف دُھنیں باری باری سنائی جائیں اورآپ سن کر محسوس کریں کہ ان میں کچھ ساز ہر دھن میں مشترکہ طور پر موجود ہیں ۔۔۔تو کم ظرفی کےساتھ آپ یہ بھی خیال کرسکتے ہیں کہ یہ ساری دُھنیں ایک دوسرے سے چُرائی گئی ہیں اور اعلیٰ ظرفی سے یوں بھی سوچ سکتےہیں کہ یہ ساری دھنیں ایک ہی موسیقار کی تخلیقی کاوش ہیں!

                                                                                 اگر آپ  کوایک تصویری ہال میں لگی ہرتصویر میں خاص قسم کے رنگوں کےشیڈز باربار دکھائی دیں۔۔۔ توآپ سطحی طورپر یوں بھی کہہ سکتےہیں کہ یہ دراصل ایک ہی تصویرتھی جس سے بعد میں تھوڑی تبدیلیاں کرکے کئی تصویریں بنا لی گئیں اور گہری سوچ کے ساتھ یوں بھی قیاس کرسکتےہیں کہ یہ تمام تصویریں ایک ہی مصور کے رجحانِ فن کا شاہکار ہیں!

                                                                                                      پست اورکم ظرفی کی  اپروچ کے ساتھ آپ کو انسان اوربندر آپس میں کزنز دکھائی دیں گے اور بلند اور اعلیٰ ظرفی کی اپروچ کے ساتھ یہ دونوں آپ کو ایک ہی خالق کی صفتِ تخلیق کامظہر محسوس ہوں گے!

**************************

ملحدین اورحددرجے نفاست سےمتعین کائنات

ملحدین اورحددرجے نفاست سےمتعین کائنات

                                                                                                                               قدیم ہوں یا جدید ، ملحدین ایک بات شروع سے اصرار کے ساتھ کرتےآئے ہیں کہ اس کائنات کاکوئی سبب نہیں، بلکہ یہ عدمیت(Nothingness) کے تاریک سناٹے میں سے ایسے ہی خودبخود pop-up   ہو گئی جیسے گرم ریت میں مکئی کادانہ پک کراچھل پڑتاہے۔اس کے بعد مادے نے پھیل کرستاروں، سیاروں اور کہکشاؤں کی صورت اختیار کرلی ۔اسی مادے سےزندگی کاظہور ہوا ، جس کے بعدقدرتی انتخاب  کے ذریعے ایک اندھے ارتقاء نے زندگی کی موجودہ صورتوں کو پیدا کیا۔

                                                                                                                                       لیکن جوچیز ان ملحدین کیلئے ہمیشہ سے دردِ سر بنی رہی ، وہ ہے اس کائنات میں طبعی قوانین (Physical Laws) اور حددرجے باریکی اورنفاست سے متعین ہوئےطبعی مستقلات(Fine-tuned Physical Constants) کی موجودگی ہے۔یہ طبعی مستقلات(Constants Physical)   کائنات اورزندگی کی بقا کیلئے ایسے باریک حساب سے موزوں ہیں کہ ان کی قیمتوں میں ذراسی کمی بیشی سب کچھ بھک سے اڑاکررکھ دے۔

                                                                                                               مثال کے طور پر اگر قوی نیوکلئیر فورس کاکمزورنیوکلیئر فورس کے ساتھ باہمی تناسب 1٪ تک بھی تبدیل ہوجائے تو کائنات میں کاربن اوردوسرے بھاری عناصر کاوجود ختم ہوجائے اوراس کے نتیجے میں ہر طرح کی حیات بھی ناپید ہوجائے۔ اسی طرح ایٹم کے اندر نیوٹران کی کمیت (ماس) میں ٪1 کی کمی واقع ہوجائے تویہ مطلوبہ شرح میں انحطاط پذیر نہ ہوپائیں اورکائنات میں صرف چند ہی ایٹم تشکیل پاسکیں اوریوں یہ وسیع وعریض کائنات نہ ہو۔اگر کائناتی پھیلاؤ کی شرح میں  اعشاری درجے میں بھی کمی بیشی واقع ہوجائے تویا تویہ کائنات بہت ہی تیزی پھیلتی ہوئی تحلیل ہوجائے یا پھر واپس سمٹ کر تباہ ہوجائے۔

                                                                                                    ان طبعی مستقلات(Physical Constants )کا ایسا باریکی اورنفاست سے متعین ہونا یہ سوال پیدا کرتاہے کہ ایک اتفاقی اسباب سے وجود میں آنے والی حادثاتی کائنات  کیلئے یہ کیا ضروری تھا کہ وہ پھیلتے ہوئے لازماً ایسی منظم اورمربوط کائنات میں  ہی ڈھلتی جس میں زندگی اورانسان جیسی باشعور مخلوق  پیداہوسکتی تھی؟

                                                                                                                یہ وہ سوال ہے جس پر سائنسدان توپریشان ہیں ہی ، ملحدین  کا تصورِ کائنات بھی لرزرہا ہے۔ ملحد سائنسدان تسلیم کرتے ہیں کہ طبعی مستقلات ایک معمہ(Paradox) ہیں جس کی کوئی طبعی توجیہہ فی الحال دستیاب نہیں ہے۔ملحدین بھی تسلیم کرتے ہیں کہ خداکے حق میں نفاست سے مرتب کائنات(Fine-tuned Universe )کی دلیل  ایسی ہے جس کارد آسان نہیں۔ مشہور ملحد کرسٹوفر ہچنیز (Christopher Hitchens) جس کاانکارِ خدا ، مخالفتِ خداتک پہنچاہواتھا، بھی اس دلیل کی اپیل کو یوں تسلیم کرتاہے کہ:

“At some point, certainly, we are all asked which is the best argument you come up against from  the other side..I think everyone picks the “fine-tuning” one as the most intriguing… even though it doesn’t prove a design, doesn’t prove  a designer, could all happened without (any reason?)….you have to spend time thinking about it, working on it…It’s not a trivial… we all say that…..”

                                                                          ”کبھی نہ کبھی ہم سب سے یہ سوال کیا جاتاہے کہ  مخالفین کی طرف سے  کی جانے والی سب سے بہترین دلیل کون سی ہے؟۔۔میرے خیال میں ہم سب ہی فائن ٹیوننگ والی دلیل کا ہی کی طرف اشارہ کرتے ہیں جوکہ بڑی قابلِ غور ہے۔۔ ۔ اگرچہ اس سے ڈیزائن ثابت نہیں ہوتا اورنہ ہی کسی ڈیزائنر کووجود ثابت ہوتاہے، یہ محض اتفاق سے بھی ہوسکتا ہے۔۔۔مگر پھر بھی آپ کو اس دلیل کے حوالے سے سوچنا پڑتاہے، دماغ لڑانا پڑتاہے۔۔۔یہ عام سی دلیل نہیں ہے۔۔۔ہم سب یہی کہتے ہیں۔۔۔“

 https://www.youtube.com/watch?v=GDJ9BL38PrI

                                                                                                    اسی طرح ملحد ماہرِ طبیعیات شان کیرل(Sean Carroll) نے ایک مباحثے میں فائن ٹیوننگ والی دلیل پر تنقید سے پہلے یہ اعتراف کیا:

“…So let’s go to the second argument, the teleological argument from fine-tuning… I’m very happy to admit right off the bat; this is the best argument that theists have when it comes to cosmology…”

”۔۔۔تو دوسری دلیل کی طرف چلتے ہیں،  فائن ٹیوننگ کی غائی دلیل۔۔۔میں بخوشی تسلیم کروں گا کہ خداپر عقیدہ رکھنے والوں کے پاس  کائناتی علم کے حوالے سےیہ سب سے بہترین دلیل ہے ۔۔۔“

 https://www.youtube.com/watch?v=zR79HDEf9k8

                                                                                                              اس کے بعد ملحدین کے جوابی دلائل زیادہ تر آئیں بائیں شائیں پر ہی مبنی ہوتےہیں۔مثلاً یہ کہ یہ طبعی مستقلات زندگی کی صرف اسی صورت کیلئے ہیں جو ہم جانتے ہیں، جبکہ ان میں تبدیلی سے ایک دوسری قسم کی کائنات اورزندگی وجود میں آسکتی ہے وغیرہ۔

                                                                                                                                                       اس دلیل کے خلاف ملحدین کی واحد امید متعددکائناتوں کانظریہ   (Theory of Multverses) ہے۔ یعنی اگر یہ ثابت ہوجائے کہ ہماری موجودہ کائنات ہی واحد کائنات نہیں، بلکہ اس کے متوازی متعدد کائناتیں پائی جاتی ہیں  تو پھرکہا جاسکے گا کہ ہر کائنات کے اپنے    مستقلات ہوں گے اورہم ایک ایسی کائنات میں پیدا ہو گئے ہیں جس میں ان مستقلات کی یہ موزوں قیمتیں ہیں۔مگر مسئلہ یہ ہے کہ اس نظریے کے ابھی تک کوئی ٹھوس شواہد سامنے نہیں آئے اورابھی تک یہ ایک ایساسائنسی تخیل ہی ہے جو صرف سائنس فکشن فلموں ہی میں حقیقت بنتاہے۔

                                                                                                                                                 اس لیے فی الوقت توفائن ٹیوننگ والی دلیل ملحدین کے حلق میں ایک ہڈی کی طرح پھنسی ہوئی ہے!

****************************