کیا اب خدا کی ضرورت نہیں رہی؟

کیا اب خدا کی ضرورت نہیں رہی؟

                                                                                                                       ملحدین کا عام اعتراض ہے کہ انسان نے خدا کاتصور فطرت کی توجیہہ (Explanation) کیلئے تراشا۔ آغاز میں انسان بہت سے قدرتی مظاہر کے بارے میں نہیں جانتاتھا کہ یہ کیسے ہوتے ہیں ، چنانچہ وہ انھیں کسی ان دیکھے خدا کی طرف منسوب کردیا کرتاتھا۔ مثال کے طورپر اسے زلزلے کی صورت میں زمین کا خوفناک انداز میں ہلنا سمجھ نہیں آتا تھا، چنانچہ اس نے زلزلوں کو خدا کی  ناراضگی کا نتیجہ قرار دے دیا۔ اسے سمجھ نہیں آتاتھا کہ نوماہ کے اندر ماں کے پیٹ میں بچہ کیسے بن جاتاہے، اس لیے وہ استقرارِ حمل کو خدائی امر مان لیتاتھا۔ اسے آسمان پر قوسِ قزاح دیکھ کر حیرت ہوتی تھی اور وہ اسے خدا کا نشان کہہ دیتاتھا۔

                                                                                                       تاہم جب سائنس نے انسان سے متعلقہ اورقریب کے ماحول میں رونما ہونے والے ہر قدرتی مظہر کی طبعی توجیہہ کردی ہے تو اب خدا کامفروضہ (God Hypothesis) قائم کرنے کی ضرورت نہیں۔ جب کائنات میں ہونے والے تمام عوامل کے طبعی اسباب معلوم ہوگئے ہیں تو اب ان کامابعد طبعی سبب فرض کرنا غلط ہے۔ جولین ہکسلے کے الفاظ میں:

“If events are due to natural causes, they are not due to supernatural causes.”

یعنی اگر واقعات فطری اسباب کے تحت رونما ہوتے ہیں، تو پھر وہ  فوق الفطری اسباب کے تحت نہیں ہوسکتے۔

                                                                                                            اس کی مثال بارش کا مظہر ہے۔زمانۂ قدیم سے انسان بارش کو خدائی عمل سمجھتے آئے ہیں، تاہم اب سائنس نے اس عمل کے تمام طبعی مراحل کی وضاحت کردی ہے۔ اس طرح بارش کے عمل کی دو تصویریں بن گئی ہیں:

بارش کی خدائی تصویر

                                                                                                                     اس تصویر میں بارش خدا کے حکم سے ہوتی ہے۔خداکے حکم سے ہی فرشتے بادل بناتےہیں، ان میں پانی بھرتے ہیں، پھر انھیں چاروں کونوں سے پکڑکر گھسیٹتے ہوئے مطلوبہ مقام تک لے کر جاتے ہیں، اس کے بعد ایک فرشتہ گرز مارکر بادلوں کو چیرتاہے اور دوسرے انھیں نچوڑ نچوڑ کر ان میں سے قطرے نکالتے ہیں، پھر فرشتوں کی ایک اور جماعت ان قطروں کو لے کر زمین پر اترآتی ہے۔یوں زمین پر بارش برسنے لگتی ہے۔

                                                                                       اس کے مقابلے میں سائنس بارش کے حوالے سے یہ معلومات دیتی ہے:

بارش کی سائنسی تصویر

                                                                                                                                   سورج کی شعاعوں کی وجہ سے دریاؤں اورسمندروں کا پانی گرم ہوکر بخارات کی شکل میں اوپر آسمان کی طرف اٹھتاہے۔آسمان کی بالائی تہوں کی ٹھنڈک سے یہ بخارات کثیف ہوکر بادلوں کی شکل اختیا ر کرلیتے ہیں۔اس طرح جب ایک بادل پانی سے پوری طرح بھر جاتاہے تو پھر کششِ ثقل کی وجہ سے پانی قطروں کی صورت میں زمین کرطرف گرنے لگتاہے۔

                                                                                                                      بارش کی اسی سائنسی تصویر کی بنیادملحدین کا کہنا ہے کہ جب بارش کے تمام طبعی اسباب دریافت ہوگئے ہیں تو اب اسے خدا کاارادہ یا حکم قرار دینے کی ضرورت نہیں رہی۔مگر یہ ایک سطحی خیال ہے جس میں ملحدین مبتلا ہو جاتے ہیں۔ذرا غور سے دیکھا جائے تو سائنسی معلومات  بارش کے حوالے سےخداکے حکم اور فرشتوں کی کارگزاری کی محض تفصیل بیان کرتی ہیں۔دونوں تصویریں ایک دوسرے کو مکمل کرتی ہیں۔

بارش کی مکمل تصویر

                                                                                                                            بارش کی مکمل تصویر اس طرح ہے کہ اس کے تمام طبعی اسباب فرشتوں کے ہی ہاتھوں عمل پذیر ہوتے ہیں۔ یعنی کچھ فرشتے سورج کی روشنی میں سمندروں کے پانی کو گرم کرتےہیں، پھر فرشتوں کی ایک جماعت پانی سے بخارات حاصل کرکےآسمان کی طرف لے جاتےہیں، پھر ایک دوسری جماعت آسمان کی بالائی تہوں میں ٹھنڈک کااہتمام کرتی ہے جس سے یہ بخارات بادل بن جاتے ہیں، پھر فرشتے ہی ان کے اندر مثبت اور منفی چارجز پیداکرتے ہیں، اس کے بعد زمین پر موجودفرشتوں کی فوج بادلوں کے اندر سےپانی کو قطروں کی صورت میں  نکال کرانھیں نیچے کی طرف کھینچتی ہے۔۔۔ گویا بارش کا یہ سارا عمل ایک خدائی لیبارٹری میں مکمل ہوتاہے۔ جس طرح ایک سائنسدان اپنی لیبارٹری میں آگ کے ذریعے پانی سے بخارات کشید کرنے کیلئے آلات (آپریٹس) استعمال کرتاہے، اسی طرح خدا بھی مادی کائنات  کے پسِ پردہ اپنی لیبارٹری میں اپنے لیبارٹری ورکرز (فرشتوں) کے ذریعے سمندروں کے پانی کو بادلوں میں تبدیل کرکے پھر بارش کی صورت میں زمین پر برسادیتاہے۔ فرق یہ ہے کہ خدا کاہاتھ، فرشتے اور ان کے آلات انسانوں کو دکھائی نہیں دیتے، ورنہ خدا کے حکم سے فرشتے اپنے آلات کے ذریعے طبعی مادوں(روشنی ، پانی اور ہوا وغیرہ) پر جو اعمال کرتے ہیں، ان کی کیفیات اورنتائج ہی وہ چیزیں ہیں جن کاانسان ظاہری طورپرمشاہدہ کرکے انھیں طبعی علت و معلول (Natural cause & effect) اور طبعی قوانین (Physical Laws) سے موسوم کرتے ہیں۔

                                                                                                                                              یوں اب بھی بارش خداہی کاکام ہے ، اسی کے اہتمام سے ہوتاہے اور اس کے بغیر نہیں ہوسکتا۔پس قدرتی مظاہر کوسائنسی طورپر سمجھ لینےکے بعد بھی خدا کی ضرورت موجود ہے، ورنہ یہ سوال اپنی جگہ ہی رہے گا کہ یہ تمام فطری مظاہر سرے سے ہوتے ہی کیوں ہیں اور ان کا ہونا کیوں ضروری ہے۔

***************************